JAKARTA | KABA MINANGKABAU NEWS
Manjalang Musyawarah Wilayah (Muswil) Dewan Pimpinan Wilayah Payuang Panji Suku Koto Sedunia (DPW PPSKS) Jabodetabek nan direncanakan digelar Desember 2026, arah organisasi ka muko mulai jadi perhatian keluarga gadang Suku Koto di rantau Jabodetabek.
Salah surang dari keluarga gadang pasukuan Koto, Mel Sofyan, manyabuik Muswil indak samato-mato soal baganti pangurus. Labiah dari itu, Muswil harus jadi momentum untuak mancaliak baliak apo nan alah dikarajokan, mambenahi nan masih kurang, sarato manyusun langkah baru supayo organisasi makin solid dan manfaatnyo makin dirasakan dek anak kamanakan.
Mel Sofyan mangapresiasi kepengurusan DPW PPSKS Jabodetabek di bawah pimpinan Anton Wijaya Koto basamo jajaran pangurus. Manuruiknyo, salah satu capaian penting periode kini adolah konsolidasi keluarga gadang Suku Koto, mulai dari niniak mamak, bundo kanduang sampai anak kamanakan dalam satu wadah organisasi.
“Fondasi nan alah dibangun ko modal penting. Kalau masih ado nan kurang, itu nan kito jadikan bahan evaluasi untuak disampurnakan. Jan sampai kekurangan nan ado malah mambuek kito lupo jo apo nan alah berhasil dibangun,” ujar Mel Sofyan.
Manuruiknyo, pengalaman jo hasil karajo kepengurusan kini patuik jadi bagian dari pertimbangan dalam manantukan arah kepengurusan periode salanjuiknyo. Namun, keputusan tantang sia nan ka mamimpin tetap harus disarahkan ka mekanisme organisasi dan mufakat dalam forum Muswil.
Ia manilai kesinambungan program penting dijago. Baganti pangurus indak berarti sagalo program harus dimulai baliak dari nol. Nan alah rancak patuik dilanjuikkan, nan masih kurang dibanahi, sadangkan nan alun tajalankan harus diperjuangkan supayo bisa diwujudkan.
Ka muko, Mel Sofyan mandorong PPSKS Jabodetabek untuak labiah serius mambenahi administrasi dan tata kelola organisasi. Database anggota juo paralu dipabarui, dibarengi jo konsolidasi untuak marangkul labiah banyak keluarga Suku Koto nan ado di Jakarta, Bogor, Depok, Tangerang, dan Bekasi.
Data anggota nan rapi, kato Mel Sofyan, indak hanya untuak administrasi. Dari sinan organisasi bisa tahu potensi jo kebutuhan anggotanyo, mulai dari kondisi sosial, pendidikan anak kamanakan, profesi, sampai pelaku usaha nan bisa dipertemukan dalam jaringan ekonomi basamo.
“Organisasi indak cukuik kalau hanya jadi tampek basuo jo basiraturahmi. Kehadirannyo harus bana-bana taraso dek anggota, baik katiko ado persoalan sosial, kebutuhan pendidikan anak kamanakan, maupun untuak mambangun peluang ekonomi,” katonyo.
Di bidang ekonomi, jaringan keluarga gadang Suku Koto di Jabodetabek dinilai punyo potensi gadang. Pelaku UMKM, pangusaha, pekerja profesional sampai generasi mudo bisa dipertemukan dalam satu jaringan kolaborasi nan saling mangguatkan.
Di bidang pendidikan, organisasi juo diharapkan bisa mambukak akses informasi dan kesempatan nan labiah luas untuak anak kamanakan, termasuk pengembangan kapasitas dan jaringan pendidikan.
Selain program, Mel Sofyan manekankan pentingnyo pendanaan organisasi nan sehat dan transparan. Uang organisasi harus dikelola sacaro tertib, tabuko dan bisa dipertanggungjawabkan ka anggota. Transparansi, manuruiknyo, jadi salah satu kunci untuak manjago kepercayaan keluarga gadang terhadap organisasi.
Ia berharap Muswil DPW PPSKS Jabodetabek Desember 2026 bisa berlangsung dalam suasana badunsanak, musyawarah jo mufakat. Beda pandangan ataupun pilihan dalam menentukan kepemimpinan jangan sampai mambao perpecahan di tangah keluarga gadang Suku Koto.
“Nan alah rancak kito lanjuikkan, nan masih kurang kito perbaiki, dan nan alun tajalankan kito wujudkan basamo. Muswil ko harus jadi momentum untuak mambao DPW PPSKS Jabodetabek makin solid, tertib, mandiri, dan bamanfaat bagi saluruah keluarga gadang Suku Koto,” pungkas Mel Sofyan. (KMKN)
