Kaba Minang Kabau News
Arosuka — Taman Hutan Kota Wisata (THKW) Kabupaten Solok nan barado di Jalan Lintas Solok–Padang kini tampak mula dibanahi. Kawasan nan dakek jo komplek perkantoran Pemkab Solok jo rumah dinas Bupati jo Wakil Bupati ko dulu dikenal kurang taurus, kini palahan-lahan mulai dibuek rapi baliak.
Lampu-lampu penerangan alah dipasang, rumpuik liar nan sabalunnyo indak taratur kini alah dipotong secara rutin, jo penataan lingkungan mulai dilaksanakan supayo THKW baliak manjadi ruang publik nan aman jo nyaman untuak masyarakat.
Pembenahan THKW ko dipelopori dek Syafri Tanjung nan akrab dipanggia Makcay. Inyo manegaskan pembenahan ko sabagai tangguang jawab moral dalam manjago aset nagari.
“Yang penting kini dibanaahi dulu. Ko bentuk dukungan ka program Bupati Solok Jon Firman Pandu jo Wakil Bupati H. Candra. Aset nagari nan dibangun jo pitih rakyat wajib dijago jo dimanfaatkan sabana,” kato Makcay.
Selain sabagai ruang tabukak hijau, THKW juo disiapkan manjadi kawasan pariwisata, termasuk wisata kuliner. Salah satu rencana nan disusun adolah mambuek pasar pabukoan di bulan Ramadhan, supayo tradisi urang awak tatap iduik jo UMKM dapek tempat nan layak.
Sekretaris Daerah Kabupaten Solok, Medison, manyampaikan bahaso Bupati Solok mandukuang penuh pembenahan THKW. Menurutnyo, THKW adolah aset strategis daerah nan mesti dikambalikan fungsinyo.
“Bupati Solok mandukuang pembenahan THKW. Ko ruang publik nan harus aman, nyaman, jo bermanfaat untuak masyarakat,” ujar Medison.
Untuak tahap awal, Pemkab Solok malalui Dinas Kominfo juo alah memasukkan jaringan internet gratis ka kawasan THKW.
“Internet gratis alah dipasang sabagai langkah awal untuak mendukung rencana taman digital di THKW,” jelasnyo.
Pemkab Solok berharap, THKW dapek manjadi pusat aktivitas masyarakat, UMKM, jo pariwisata, sakaligus manjadi solusi penataan kawasan Tugu Ayam supayo baliak rapi jo indah sabagai ikon Kabupaten Solok.
(KMKN)
