Kaba Minang Kabau News
LINTAU BUO – Shanty, anak nagari Lintau, Kabupaten Tanah Datar, kini manjadi buah muluik urang banyak. Perampuan Minangkabau ko berhasil mambao masakan kampuang halaman ka nagari Tiongkok, malalui usaha food truck nan manjuo masakan khas Indonesia, terutama rendang Minangkabau.
Lewat saluran YouTube Shanty Di China, Shanty mulai dikenal luas, bukan sajo di Indonesia, tapi juo di Tiongkok. Ia memperkenalkan cita raso masakan Nusantara ka masyarakat di wilayah China Timur Laut, daerah nan bariklim dingin jo sering basalju. Masakan nan sarupo rendang, sate, soto, jo bakso jadi perhatian warga setempat.
Sabalum manetap di Tiongkok, Shanty punyo latar balakang di dunia kuliner. Ia pernah baraja jo barapek di dapua salah ciek restoran di Jakarta. Pangalaman itulah nan manjadi modal utamo untuak mamasak masakan Indonesia jo raso nan tetap asli walau jauah dari kampuang halaman.
Shanty manikah jo Johnny, urang Tiongkok, jo kini alah manjalani rumah tanggo salamo 15 tahun. Kini, Shanty tingga basamo suami jo duo urang anaknyo, Ailin jo Hanqi, di Gushan, Donggang, Provinsi Liaoning. Daerah ko dikenal sabagai wilayah nan dingin bana di musim salju, namun hal itu indak manyurutkan niat Shanty untuak barusaha.
Bersamo suami jo adiak iparnyo, Shanty mamakai food truck sabagai sarana manjuo masakan. Menu nan disadioan antaro lain rendang daging, sate ayam jo bumbu kacang, soto Betawi, soto ayam, jo bakso urat. Rendang Minangkabau manjadi menu unggulan nan paling banyak diminati oleh pembeli.
Masyarakat lokal Tiongkok nan awalnyo alun tabiasa jo raso pedas jo bumbu kental, lambek laun mulai manyuko masakan nan disadioan Shanty. Reaksi warga nan jujur, mulai dari ragu, panasaran, sampai ka manyuko, manjadi bagian penting dari konten nan ditampilkannyo.
Hinggo bulan Agustus 2024, saluran YouTube Shanty Di China alah punyo labiah dari 2,31 juta pelanggan. Angko ko manjadikan Shanty sabagai salah ciek kreator diaspora Indonesia nan paling banyak ditonton di Tiongkok.
Konten nan ditampilkan indak hanya mambicarokan soal masakan, tapi juo kahiduikan rumah tanggo lintas budaya, aktivitas barusaha, jo interaksi keluarga jo masyarakat sakitar. Hal ko manambah daya tarik jo kapercayaan penonton.
Keberhasilan Shanty manjadi contoh urang Minangkabau nan marantau tapi tetap mambao jati diri. Ia indak malupo asal-usul jo budaya, malah manjadikannyo kakuatan untuak barjuang jo mancari hiduik di rantau urang.
Dari Lintau ka Tiongkok, masakan Minangkabau kini dapek dinikmati oleh masyarakat dunia. Kisah Shanty manjadi bukti, raso jo budaya dapek manyatukan perbedaan, jo urang Minang sanggup hiduik jo barhasil di mano pun bumi dipijak.
(KMKN)
