KABA MINANGKABAU.COM | JAKARTA
Peringatan Hari Ulang Tahun (HUT) ka-10 Ikatan Keluarga Minangkabau (IKM) dinilai jadi momen nan pas untuak mambuek arah baru organisasi. Wakil Bendahara Umum DPP IKM, Mel Sofyan, mangajak saluruah pangurus jo warga IKM manjadikan dekade kaduo sabagai maso kebangkitan ekonomi urang Minang di rantau.
Manuruik Mel Sofyan, salamo sapuluah taun terakhir, IKM alah tumbuah jadi salah ciek organisasi perantau Minangkabau nan gadang, punyo jaringan panguruih mulai dari pusat, daerah, sampai ka luar nagari. Modal sosial nan gadang ko, katauanyo, indak buliah ciek-ciek jadi ajang silaturahmi sajo, tapi haruih disuliah jadi kakuatan ekonomi nan manguntuang urang awak.
“Dekade partamo IKM fokus mambangun organisasi. Kini maso dekade kaduo, IKM haruih mambangun kakuatan ekonomi urang Minang di rantau,” ujar Mel Sofyan.
Inyo manilai, ukuran kasuksesan organisasi ka muko indak lai cukup dihitung dari banyaknyo panguruih atau ramainyo acara. Nan labiah penting adolah barapo banyak paluang usaha nan lahir, lapangan karajo nan tacipta, investasi nan masuk ka Ranah Minang, serta manfaat nan dirasokan dek anggota jo masyarakat.
Di tangah parubahan dunia nan makin capek, tarutamo jo kamajuan teknologi digital jo Artificial Intelligence (AI), Mel Sofyan manyabuik IKM indak buliah katinggalan. Organisasi haruih mampu manyatukan pangusaha, profesional, akademisi, palaku UMKM, generasi mudo, sampai diaspora Minangkabau di mancogaro dunia dalam satu jaringan kolaborasi.
“IKM haruih jadi rumah gadang bagi saluruah urang Minang di rantau. Rumah nan mampatamukan potensi, mambukak paluang, jo malahian labiah banyak pangusaha, profesional, akademisi, palaku UMKM, serta generasi mudo nan punyo daya saing tinggi,” katauanyo.
Manuruik inyo, pangusaha nan alah maju dapek jadi pembimbing untuak UMKM. Kalangan profesional dapek mambukak akses karajo jo jaringan bisnis. Akademisi mambagi ilmu jo inovasi, sadangkan urang Minang nan barado di luar nagari dapek jadi jambaatan dagang, investasi, promosi, sampai mambukak pasaran produk-produk urang awak ka tingkat nasional jo internasional.
“Kalau saluruah potensi ko tasambuang jadi satu, kito indak sajo mambangun kasajahteraan basamo, tapi juo malahian perantau Minangkabau nan tangguh, mandiri, jo mampu basaing di mano sajo inyo barado,” ujarnyo.
Sabagai arah baru organisasi, Mel Sofyan mangusua limo langkah strategis, yaitu mambangun basis data digital perantau Minangkabau, mambuek IKM Business Network, mangambangkan program pembinaan UMKM jo pangusaha mudo, mandorong investasi diaspora ka Sumatera Barat, serta maningkekkan kualitas sumber daya manusia malalui palatihan digital, kewirausahaan, jo kecerdasan buatan.
Manuruik inyo, organisasi nan gadang haruih punyo ukuran kasuksesan nan baru.
“Ka depan, kasuksesan IKM indak lai dihitung dari banyaknyo panguruih, tapi dari barapo banyak usaha nan lahir, lapangan karajo nan tacipta, investasi nan masuak ka kampuang, jo generasi mudo nan berhasil dibina,” tegasnyo.
Mel Sofyan juo maingekkan bahaso kasuksesan urang rantau indak buliah baranti pado kasuksesan pribadi sajo. Samakin kuat ekonomi perantau, samakin gadang pulo tangguang jawab untuak mambangun kampuang halaman malalui investasi, pambukaan lapangan karajo, pangembangan UMKM, pendidikan, jo kegiatan sosial lainnya.
Inyo mangajak saluruah panguruih untuak manjago komunikasi, mamaliharo tali persaudaraan, serta mambangun budaya kolaborasi.
“Beda pandangan itu biaso dalam organisasi. Nan penting kito punyo tujuan nan samo, saling manguatkan, jo basamo-samo mancari jalan untuak kamajuan IKM,” katauanyo.
Mel Sofyan manyabuik, falsafah Minangkabau “barek samo dipikua, ringan samo dijinjiang” haruih tetap jadi sumangek dalam mambangun organisasi. Sementara falsafah “di mano bumi dipijak, di situ langik dijunjuang” manjadi pegangan bagi saluruah urang Minang di rantau untuak manjago marwah kampuang halaman sakaligus mambari manfaat di tampek inyo hiduik.
Pado momen HUT ka-10 IKM ko, Mel Sofyan juo manyampaian tarimo kasih ka para pandiri, urang tuo-tuo organisasi, Ketua Umum, panguruih, jo saluruah anggota IKM nan alah manyumbangkan pikiran jo tanago salamo sapuluah taun.
“Atas namo pribadi, ambo mangucapkan salamaik HUT ka-10 IKM. Tarimo kasih ka saluruah pandiri, sesepuh, Ketua Umum, panguruih jo anggota IKM di Indonesia maupun di mancogaro dunia. Pondasi nan alah dibangun ko adolah amanah nan haruih kito jago, rawat, jo kembangkan basamo,” ujarnyo.
Mangakhiri panyampaiannyo, Mel Sofyan mangajak saluruah keluarga gadang IKM manjadikan dekade kaduo sabagai babak baru organisasi.
“Kini lah wakatuonyo IKM malangkah labiah jauah. Dari organisasi silaturahmi manjadi organisasi nan mambangun kasajahteraan. Dari jaringan sosial manjadi jaringan ekonomi. Kalau ekonomi urang Minang di rantau makin kuat, insya Allah kontribusi untuak Ranah Minang juo akan makin gadang. Itulah cita-cita basamo nan haruih kito perjuangkan,” tutup Mel Sofyan.
(KMKN)
