KABA MINANGKABAU NEWS
BUKITTINGGI ,Jajak kejayaan Kabupaten Solok dalam Jambore Kader PKK Tingkek Provinsi Sumatera Barat indak balanjuik pado 2026. Sasudah tigo kali maraih gala juara umum dalam babarapo edisi sabalunnyo, posisi paliang tinggi itu kini baraliah ka Kota Sawahlunto.
Sawahlunto resmi ditetapkan sabagai Juara Umum Wirakarya Jambore Kader PKK ka-XXII Tingkek Provinsi Sumatera Barat. Panatapan itu diumumkan dalam acara panutupan di Istana Bung Hatta, Kota Bukittinggi, Kamih (3/9/2026).
Kegiatan nan balangsuang tanggal 1–3 September 2026 tersebut diikuik’i kader-kader terbaik utusan 19 kabupaten jo kota. Jambore ko dirangkai jo Peringatan Hari Kesatuan Gerak (HKG) PKK ka-54 Tingkek Provinsi Sumatera Barat.
Sawahlunto marabuik gala juara umum sasudah mangumpuakan prestasi dalam sejumlah cabang. Kontingen itu maraih Juara I Defile, Juara I Bamain Peran Sanitasi Total Berbasis Masyarakat (STBM), Juara II Solo Song, Juara III Paduan Suara, Juara III Cerdas Cermat, sarato Harapan I Kampanye Pangolahan Sampah.
Akumulasi hasil tersebut mangantakan Sawahlunto manarimo piala tetap jo piala bagilia. Katua TP-PKK Kota Sawahlunto basamo parwakilan kontingen dipanggia ka ateh pangguang untuak manarimo penghargaan sabagai kontingen terbaik Jambore Kader PKK Sumatera Barat tahun 2026.
Kemenangan Sawahlunto sakaligus manandai tarantinya dominasi Kabupaten Solok. Dalam periode nan barhasil ditelusuri, Kabupaten Solok tacatat tigo kali manjadi juara umum, masing-masing pado 2021, 2023, jo 2024. Walaupun indak diraih tigo tahun baturuik-turuik, gala 2023 jo 2024 mampu dipatahankan sacaro baruntun.
Pado 2021, Kabupaten Solok manjadi Juara Umum Jambore Kader PKK ka-XVIII di Kota Pariaman. Dalam palaksanaan itu, kontingen Kabupaten Solok tacatat maraih tigo peringkat terbaik I.
Kabupaten Solok indak manjadi juara umum pado 2022, namun masih mambao pulang ampek penghargaan. Prestasi itu tadiri dari Juara I Vlog Pokja IV, Juara II Mars Dasawisma, Juara II Stand UP2K-PKK, sarato Juara II Marancang Busana Kembaran.
Jajak kejayaan Solok baliak balanjuik pado 2023. Dalam Jambore Kader PKK ka-XX, Kabupaten Solok maraih Juara I Bamain Peran PAREDI jo Juara I Video Pendek atau Vlog. Tigo penghargaan lainnyo adolah Juara II Defile jo Yel-yel, Juara II Ekspose Katua TP-PKK Nagari atau Desa, sarato Juara II Pangolahan Makanan Panutuik.
Akumulasi prestasi itu mangantakan Kabupaten Solok baliak marabuik gala juara umum. Pado 2024, dominasi tersebut berhasil dipatahankan dalam Jambore Kader PKK ka-XXI nan diselenggarakan di Alahan Panjang Resort, Kabupaten Solok.
Waktu itu, Kabupaten Solok mangumpuakan anam penghargaan, yakni Juara I Paduan Suara PKK, Juara I Mamasak Menu Pangan Lokal Nonbareh, Juara II Jingle Gelari Pelangi, Juara II Senam Kreasi Anam Langkah Cuci Tangan, Juara III Defile jo Yel-yel, sarato Juara III Cerdas Cermat.
Rangakaian prestasi 2021, 2023, jo 2024 manampatkan Kabupaten Solok sabagai salah satu daerah nan paliang diparhituangkan dalam Jambore Kader PKK Sumatera Barat. Namun, kekuatan tersebut alun mampu dipatahankan pado palaksanaan 2026.
Dalam cabang Jambore tahun ko, TP-PKK Kabupaten Solok hanyo mampu maraih Juara I Solo Song. Sementaro itu, hasil dalam Pamilihaan Dasawisma Berprestasi jo Lomba Gerakan PKK sabagian gadang masih barado pado posisi harapan.
Dasawisma Bawang Perai IV, Nagari Koto Gadang Guguak, Kecamatan Gunuang Talang, nan mewakili Kabupaten Solok dalam Pamilihaan Dasawisma Berprestasi kategori kabupaten, manampati posisi Harapan III.
Dalam Lomba Gerakan PKK kategori kabupaten, Nagari Tanjuang Baliak, Kecamatan X Koto Diateh, maraih Harapan I bidang Kelembagaan jo Tertib Administrasi PKK, Harapan III PAREDI, Harapan III Kawasan Aku Hatinya PKK, sarato Harapan I PHBS Plus.
Hasil tersebut mampaliekkan jarak nan cukup jaleh dibandingkan capaian Kabupaten Solok sabalunnyo. Pangalaman manjadi juara umum tigo kali alun barhasil dikonversi manjadi hasil maksimal pado kompetisi tahun ko.
Panutupan kegiatan juo malahiakan duo juara umum dalam kelompok panilaian nan babeda. Kabupaten Pasaman ditetapkan sabagai Juara Umum Lomba Gerakan PKK kategori kabupaten, sadangkan Kota Padang Panjang maraih Juara Umum Lomba Gerakan PKK kategori kota.
Gala itu indak samo jo Juara Umum Wirakarya Jambore. Berdasarkan kaputusan nan dibacokan dalam acara panutupan, gala utama Juara Umum Jambore Kader PKK ka-XXII tetap diraih dek Kota Sawahlunto.
Tarantinya dominasi Kabupaten Solok indak harus dipandang samato-mato sabagai kahilangan piala. Namun, hasil 2026 patuik dijadikan bahan evaluasi manyaluruah taradok pola pambinaan kader, pametaan cabang unggulan, proses seleksi peserta, kesiapan maadoki perlombaan, jo efektivitas pandampingan.
Prestasi maso lalu samestinyo manjadi modal untuak mampatahankan standar organisasi. Tanpa pambinaan nan konsisten jo persiapan nan tararah, status sabagai juara batahan indak sacaro otomatis bisa mambao sabuah daerah baliak manduduki posisi paliang tinggi.
Sawahlunto layak mandapek apresiasi dek mampu tampil konsisten di tangah pasaingan 19 kabupaten jo kota. Di sisi lain, hasil ko manjadi pangana bagi TP-PKK Kabupaten Solok bahwa dominasi nan dibangun dalam babarapo edisi akhirnyo taranti pado 2026.
Kini, tantangan Kabupaten Solok bukan sakadar marabuik baliak piala bagilia. Nan labiah pantiang adolah mambuktikan bahwa jajak tigo kali juara umum masih bisa dijadikan dasar untuak mambangun baliak kualitas, daya saing, jo konsistensi kader TP-PKK pada palaksanaan salanjuiknyo.
(KMKN)
